الصــمت صـــوت ...

الصمت صوت ...

صوت الأنين اللى اتكتم....جوًه البيوت

صوت اللى يترجى الألم....علشان يموت

صوت السكوت اللى اتخنق....ورا ضل سوط!!!

الصمت صوت...

صوت العذاب من غير سبب....ولا رحمة فيه

صوت القمر ....لمًا السحاب طرفت عنيه

صوت البريق اللى اتكسر....صوت الشجر

لمًا الخريف قرًب عليه

صوت كبرياء....الخوف بيقتل عِزها

صوت أبرياء....بتخاف لتنطق إسمها

صوت اللى عاش....يحلم بشوق موصلش ليه

صوت الوداع....احباب تفارق بعضها

صوت الخداع....صوت الخيانة وطبعها

صوت مانتهاش....دايما نهايته بتبتديه

الصمت صوت....لسه القلوب مبتسمعوش

لسه الكلام مبيعرفوش....لسه الحروف متكوَنوش

لسه العقول..مِختلفه على معانيه

صوت النجوم ....ساعة ماروحها بتنقبض

من قٌرب فجر بيتولد....ويا النهار

صوت السحاب....لما فى مكانها بتتنفض

وسط الشتا....صوت المطر فى سقوطه منها والإنتحار

صوت الحقيقة المؤلمة....صوت الضمير المستعار

الصمت صوت عالى وحزين....ومع الأسف ملهوش قرار

صوت ابتسامة فى العيون....مكسورة خوًافه

وقلب دايب م الظنون....مقدرش يتعافى

وحٌزن خافى ملهش لون ...

وازاى يكون للحٌزن لون....والدمعه شفافه؟؟!!

ترنيمة رجوع ...

لــمـّــــا الكــــلام اللــــى انكَـــتـَــب
مـــن 900 مليـــــــون سنــــــــــــه
من قبل حـــوُّا ما تتخلق
من ضلع آدم ....النبى
ما كفــّــانيش
فقلت.....
أسرق لك حلق
أصل الرغيف
واكل دراعى
فَ ما تفهميش
إن الخضوع من قبل أول سـِـلـِـمـَـــه
يبقى الرجوع أصبح قلق
وما تمسكيش
طراطيف صوابعى وتشهقى
دَمـَّــــكْ بيهرب قبل ما آخد حصتى
نظرة عنيكى تحت جلدى بتوجعه
فّ بلاش تروح سكينة الحرف لبعيد
وتحز قلبى من وريده وتخلعه
وبلاش تشيلى التكلفه
عند العتاب
أصل اللى تاب م الذنب
موش زي اللى ناقص
تربيه
يا سنين عجــــــاف
إتــْــــأخـَــر الصـــِـــِّديق قوى
كان نفسى اكــــون
من غير ما اخـــاف
سارق صــــُــــــواع
علشان يــِــكـَــــفــُّــــونى
مــَــؤونــــــة معدتـــــــى
ما توسعى ضلوعك شِويّــــه
لــِمـُــهرتى
علشان تفوت تحت الحجاب
هِـــوَّ الحساب حَ يكــون
كواجب منزلى
قلمى الرصاص
سـِـــنــٌّـــه اتفــَــطــَــمْ
لـــمـَّـــــا اتقطــَــــــــمْ
على باب غروبك
فاضطر اكتب كلمتينى
جـِــــوَّا منـــــــــى
واختلق
مليون سبب للمشكله
إزّاى قدرتى ما تقرِنـِـيشْ
وانا اللى كنت باشـَـقـْـشــَــقـِــكْ
وأجيب لك الصبح النــَــدِي
وأعــَــلــِــمــك
إزّاى هنا تتوَحدى
مع قلب بيحبك .........قوى
العشــــق.....
قاتل سرمدى
فَ بلاش نعافر فى الرجوع
مواضيع كتير مفتوح جروحها
فِ وِشـِّــــــــنا
والـــدَّمْ
أزرق مــُـنـْـــحـَـــنى
كان فيه دراع
بيضُمِنى
لو ماتت الخطوه على خد الطريق
يبقى الرجوع
أصبح غبى
لــِــفــِّــى الضفيره تحت دقنى
واشنقى
دا الشنق أول مطلبى
وايــّــاك فى يوم
تستغربى
إزّاى ما كانش فــِــيــّــا روح
ولا كنتِ قادره
من سِنِينكْ
تهربى

مش عارف اشوف ...

مش عارف اشوف

مش أعمى صحيح
لكن ... مش عارف اشوف
.....
مفتوحة عنيا ومش شايفين
مكبوتة الآهة ف جوفي سنين
والخطوة ف وسط الضلمة سراب
سرداب القلب وراه سرداب
واقف ع الباب ... حظي المسكين
ونجوم الليل غابت عني
مين اللي حبسهم في الزنازين
مين شنق الحلم بحبل الخوف
.....
مش أعمى صحيح
لكن ... مش عارف اشوف
.....
مش أعمى صحيح
و ف قلبي حنين
عمال بيزيد
راجع لشقاوة طفل سعيد
وسط اخواته
عمال يتنطط يوم العيد
فرحان بهدومه ولعباته
ماشي يغني
ويدوس ع الهم بنعل جديد
شايف في السما نجمة بتضحك
بين النجمات
ماسك ف ايديه حبة جنيهات
لكن من عبطه فاكرها ألوف
.....
مش أعمى صحيح
لكن ... مش عارف اشوف
.....
مش أعمى صحيح
و ف قلبي أنين
ملازمني سنين
ماشي في ضلي
ولا بيخلي
الفرحة تقرب من قلبي
حتى ثواني
وهموم الدنيا محاوطاني
وف كل طريق
عملالي كمين
وقف عندك
رايح على فين ... يا سلامة الشوف
.....
مش أعمى صحيح
لكن ... مش عارف اشوف
.....
مش أعمى صحيح
وف عقلي حاجات
بتجيني ساعات
واخداني لحد العمر الـ فات
شئ م الحسرة
ساكن فيا
ولا كان بأديك ... ولا بأديا
القهر اللي دبحني و راح
يملى جراح القلب أهات
لو هتكلم
هتلاقي الكلمة المجنونة
مسكونة بجني عليه حركات
عايز يخرج بره القمقم
ويسافر مهما يشوف مسافات
لكن هشتري بكلامي سكات
واعمل مكسوف
.....
مش أعمى صحيح
لكن ... مش عارف اشوف

ســــــــــــــر ........

القصه لسه بتبتدى
وحكايه انى عايش
بس ليكى
منتهيه
انا البطل
وانتى الروايه كلها
فى التمثيليه

ومين غيرك
هاقوله الشعر
واقوله الغنوه والموال
كلامى اتقال
ومش راجع
ومش ناوى اقول غيره
**********
اقولك سر
ومين خلقك
يا بنت الناس
يا حته ماس
انا فارد ف قلبى قلوع
ما ليها زى
عشان اقدر اخليكى
لعينى الضى
واشوف بيكى
واكون ليكى
واجيبلك م الورود الوان
وازرعلك ف يم القلب
ميت فدان
وتبقيلى
شجر طراح بكل الخير
وتبقيلى كشدو الطير
واكون موصوف علشانك
وورده ف قلب بستانك
وراضى حتى انى اكون
مجرد خيط
ف فستانك
انا نفسى يجينى اليوم
واكون سجنك وسجانك
ولا يشوفكيش
بشر غيرى
وعلشانك
انا فايت ف قلب الكون
ومش راجع
والا معايا م البشرى
ميتين بشرى
علشانك
*********
حبيبتى بجد
هاقولك سر من تانى
وكلمه اكيد مسيرها تكون
علشانك وعلشانى
انا مغرم باحوالك وترحالك
وفين ما تكونى يا حبيبتى
انا راح اكون
انا ف البعد متلملم مع الافكار
وقلبى ف البعاد صابر
ومستحمل
وبيجمل ف طعم الصبر
ولما هييجى يوم القرب
هيزغرد
ويبقالك كانه البلبل الشادى
يقول ف الشعر
حتى الشعر
مش طالع
وكل القول
دا ميكفيش
بانه يطلع الاحساس
يا اغلى الناس
كلامى مش كلام وخلاص
كلامى ان دل
فانه يدل ع الاخلاص
وحبه شوق
وحنيه وملاغيه
ولا يكفي
لكن لسه ناقصله الفعل
وفعلى عن قريب
هيبان
ولما يبان
هتبقيلى
وهابقالك
تناديلى
تلاقى بسرعه قلبى
ساب مكانه وطار
وغنالك
غناوى المحرومين م الشوق
وم الافراح
غناوى المشتاقين
للعشق يوم يزرع
ف القلوب
شجره هنا وافراح
دا شوقى للهوى طراح
وبستانك
اكيد هيساع
اكيد اصل الهوى انواع
ومهما هاقول
ومهما الشعر عنك قال
انا عشقك
وانتى بجد شاغله البال
ومين غيرك
هاقوله الشعر
واقوله الغنوه والموال

شيبتك اوان ...

ولساك بتنحت شكل بسمة
فى اللى فات
وترسم شفايف
بتضحك فى وشك
وتصنع حكاوى
تبيد السكات
تبالغ فى وصفك
وتكذب فى سرك
وتحسب ثوانى لغاية
ساعات
ووقتك ده ماضى
وجيًك رمادى
خلاص كله عادى
تعيشها آهات
هتفضل تدور على
حب صادق
وتكدب تزور
فى كل المناطق
وترجع تبرر
فهم المبادئ
وتقنع فى نفسك
ظروف أو طوارئ
وتمسح دموع الأمان
اللى كان
ويدمع ربيعك
ويندب كمان
هتعند؟ قصادك
خطاوى الزمان
شبابك فى شيبة
وشيبتك اوان

الحب ليه بالشوك طلع ..؟

الحب ليه بالشوك طلع

وياك يا عيد
بكره اكيد في رجعتك
هتشيل يا عيد مني الوجع
والاقي قلبي الي انجرح
يرجع يدوق طعم الفرح
وأشوف أماني حلمت بيها فـ دنيتي
ومعاها تاني بسمتي
احلى الكلام
وسحابة بتضلل علينا بالوئام
والقى الزهور تفرش ربيع
دنيا الامل
لكن يا دنيا الي افتكرته فـ يوم ملاك
أصبح هلاك....
وياه بشوف أمالي ليه صبحت سراب
وان يوم ندهت ما فيش جواب
وبقيت أمير في شرنقة
عايش حياتي في العذاب
والقلب من صدري انخلع
شايفه بعيد عن جنتي
حتى الوصال بينا اختفى
واحصد حنيني وشوق زرعته فـ دنيتي
غدر وألم
الحب ليه بالشوك طلع
وصبح عدم !!!