من غير كفن !!!

وبحاول احضنى
وادفى احساسى اللى تلج
م الفراق
واصلب عود الصبر
اللى م الجرح انحنى
من لسوعات صهد الحياة
على ضهر حلمى اللى اترمى
قدام عينيا بيندفن
من غير كفن
ولا حتى غُسل
ولا لون سواد ولا نهنهات
ولا إيد رحيمة تسمى وتغمض عينيه
ولا قلب يجرى ويحضنه
ويبكى عليه
وإيد الظلم تتشعب خيوط
وتحبل الطغيان توائم
لجل تجهض من امانينا
المنى
والكسرة بنت التوهة بتسلم
ليأس
وبدوره يتسلم لنا
واليأس زى الموت
يدوم
وكابوسه يتفسر ضنا

رســــالـــــة.....

فاضل يادوب ع الحلم ساعة وينتهى
من غير شروط
زى النهار
وانا لو بإيدى الاختيار
يا إما افوق من دوامات الوهم واقتل سكنتى
ويا اما افضّل لانتحار!


بسم الملاك اللى اترسم شمعاية بين جفنك دهور
باسم الزهور ؛ واسم البحور
واسم الشراع اللى اتنصب
فى وجوه طوفان ريح الغرور
(بستحلفك)
فكى القمر م حبسته
وشيلى الرضيع م المقصله
ومتحجبيش قطرة مطر عن أرضها
بحجة فوات المرحله !


سراديب غرامك ياأميرة عصرنا
غايره ف بطون التضحيات
من فينا فات
حامل شموع شبه السيوف
باحث عن الشوق
اللى مات ؟!
مين اللى سمر فى القلوب مسمار جُحا!
وصفد جميع الأُمنيات ؟
مين اللى لطخ بالدموع
لون الضحى
وحرم ولادك ع البنات؟!
فين اللى كان
فارس زمان
مين اللى خان
باع الإوان
مين اللى دان واللى استدان
مين اللى هان واللى استهان
مين اللى كَمم فى الآذان
صوت الأذان ؟
مين اللى حكم عنكبوت
فى بلاد ذباب
مين اللى شاب
لما انسجن
جوه الكتاب
سطر فى تاريخ
مين اللى زارع فى العطور
بعد أما كان تاجر فسيخ !
مين اللى كَفر عم مسلم
لما عيط ع الضريح !


لسه الولد واقف مكان نخلة زمان
غارس فى ننى العين شجر / فدان حنان
وقيراط مواجع جنب منه سهم خوف
مزروع فى قلبة الشمعدان
والشاى بيغلى فى الكفوف
يمكن يفوت طيف الضيوف
ع المهرجان
اصل اللى عاش يحلم بمية للشطوط
زى اللى عاش مستنى من حوض السمك
يطرح ياقوت !
من غير شروط

كل الموتـ فراق ولكنـ ,, بعضـ الفراق موتـ ..

خلاص يعني .. ؟؟

مفيش عندك حلول تانية .. !!

هنتغرب ..

وهنفارق أنا وأنت

حياتنا وبيتنا وحارتنا ..

وهنشيل الهموم تاني .. ؟؟

ومن غربتنا هنعاني .. !!

خلاص يعني .... ؟؟؟

هنمشي لوحدنا تايهين

ونرجع أمتي مش عارفين

ونسأل تاني كل الناس

منين السكة والمشوار ؟؟

ونحلم أن بنا حوار

فنتكلم ومش سامعين .. !!

أتاري كلامنا مش واصل

وناخد يجي 100 فاصل

عشان نلمح صدي صوتنا

فنلقي الغربة في حياتنا

بتوجعنا وتكبتنا ..

بتبعدنا يا صاحبي بعيد

وتوعدنا بوعد جديد

هتجمع بنا مهما نغيب..

نصدقها ..... ,

ونتحمل سنين ,.. وسنين

مفيش فايدة ...

سنين الغربة مش واضحة

ومش باينة ..

منتحملشى فرقتنا

ساعتها الشوق هيغلبنا

ونشتاق يوم للمتنا ..

ندور ع الصور فينا

فنلقي صورة في عنينا

نغمض جفننا ونضحك .. ,

ولما نحب نتقابل ..

ولما نحب نتكلم ..

هنفتح دُرج جوابتنا

ونتقابل في أحلامنا

ونتكلم أنا وأنت ..

وأفوق من حلمي مشتاقلك

حنين الروح بيندهلك

وأحس بأني محتاجلك

لكن في الغربة مش طايلك ..

ولما اسرح كدا شوية

أشوف مشهد بيتعبني

عيوني بتبكي على حالنا

وأخاف من بعد غٌربتنا

نعود ناسين اللي كان بينا

وأشوفك افتكر بكرة

أخاف من غربتي الجاية

وأخاف من تاني نتفرق .. ,

لكن مبخافشي تنساني

ولا بتغلبني أحزاني

وبدعيلك يا صاحبي تعود

ولو محتاجلى أكون موجود

وبدعي لربنا المعبود

ميجعلشي مابنا حدود

وبكرة يا صاحبي نتقابل

وتاني نعووووود ...

كل الموتـ فراق ولكنـ ,, بعضـ الفراق موتـ ..

صوت ونغم ..

صوت ونغم ..
بيزغزغ الودن الحزينة بنشوة ألم ..

والقلب يبني جدار ورق
وسط النخيل
ولما عشق سوره اتهدم ..
وقام مفجر قنبلة بكل الندم ..

خايف يكون
عايش بدون
روح او جسد
لما الجسد سلم لحبك
واتقسم مليون لغم ..

شعري رسم
صورتك في لوحة زينت كل الدفاتر
وبحكم فاتر
شعري اتنسى واتشهر اللي اترسم ..

حتى السطور
فضلت بتنسخ اسمها
من غير قلم ..

سامع كمنجة
بتبوس شفايف الناي الحزين
وبهمستين
فجر مشاعر
زي بركان من حمم ..

خلى حصان الشوق
يرقص من غير لجام
بس شعاع الشمس جاله ولجمه
وفكره بانه انهزم ..

عشت في قصري بخدمك
وانا الملك
وانتي اميرة بتقتلي كل الخدم ..

قلبي عمره يوم ما ينسى قسوتك
ولا منه مرة داوى جرحه وانتقم ..

الصوت انعدم ..
ورجعت تاني للسكون
ولما بكون
عايش بصمت بتختفي كل الامم ..

واسكن في دولة عندها سنتين حداد
والامتداد واجب بتنكيس العلم ..

لحظة صدق كدابة ...

برداااااان أوي
مع اني لابس حتتين احزان




كتير بفوت جوايا وارميلي السلام
من غير كلام
بضحك معايا علي الوجود
ونكون صحاب
نتلاقي في ساعة غروب
وساعتها بس
بكون أنا

وحيد أووي
وبفض خيط الصمت .. بشوية صدي
وعشان كده
بشبط في خيالات الصحاب

بسند علي ضلي
في ساعة حب
عاده في عز الاشتياق بتكون
تخلص في لحظة صدق كدابه
يضحك زماني ع اللي فاض مني

)نهايه(


دفيان أوي
لما ابتديت
اخلع براءتي علي الملئ

العيد خلص ...

العيد خلص ..
والكحكه نشفت م الهوي ..
والشاي برد ..
قلت إتفرد فوق السنين
وامضغ شوية ذكريات ..
المشكلة ..
اني بقيت ربع قرن..
والقلب عمره الف عام
زارعين علي عنيك الكآبة والملل ..
مليون خلل ..

قلبك ورق
يوم ينطوي ..
يوم ينتني ..
يوم يتحرق ..
والكل بيشخبط
النبض يتلخبط
يعلن تسمم ف البدن
كتر المحن اصبح طريق

لما بدوخ ..
وادخل حيطانه التقي
حبة صور
من علبة الزمن القديم متكونة
ومدونة جواه شعب
انسي التعب
وافضل اغني للصور
للعمر لما ينسرق

ساكناك جبال
ساكناك حفر ..
وايام سفر ..
وذنوب يا ريتها
تتغفر ..
وسكات ماليك..
اكتم سكاتك الا غيرك يسمعه
واللا اخلعه
وارميه بعيد..
المستفيد م القلب راح
سابلك جراح
خلص كتابه وشخبطه
ورماك علي كل الطرق
ماهو اصل قلبك ..
من ورق
وف لحظة راح