مش عارف اشوف ...

مش عارف اشوف

مش أعمى صحيح
لكن ... مش عارف اشوف
.....
مفتوحة عنيا ومش شايفين
مكبوتة الآهة ف جوفي سنين
والخطوة ف وسط الضلمة سراب
سرداب القلب وراه سرداب
واقف ع الباب ... حظي المسكين
ونجوم الليل غابت عني
مين اللي حبسهم في الزنازين
مين شنق الحلم بحبل الخوف
.....
مش أعمى صحيح
لكن ... مش عارف اشوف
.....
مش أعمى صحيح
و ف قلبي حنين
عمال بيزيد
راجع لشقاوة طفل سعيد
وسط اخواته
عمال يتنطط يوم العيد
فرحان بهدومه ولعباته
ماشي يغني
ويدوس ع الهم بنعل جديد
شايف في السما نجمة بتضحك
بين النجمات
ماسك ف ايديه حبة جنيهات
لكن من عبطه فاكرها ألوف
.....
مش أعمى صحيح
لكن ... مش عارف اشوف
.....
مش أعمى صحيح
و ف قلبي أنين
ملازمني سنين
ماشي في ضلي
ولا بيخلي
الفرحة تقرب من قلبي
حتى ثواني
وهموم الدنيا محاوطاني
وف كل طريق
عملالي كمين
وقف عندك
رايح على فين ... يا سلامة الشوف
.....
مش أعمى صحيح
لكن ... مش عارف اشوف
.....
مش أعمى صحيح
وف عقلي حاجات
بتجيني ساعات
واخداني لحد العمر الـ فات
شئ م الحسرة
ساكن فيا
ولا كان بأديك ... ولا بأديا
القهر اللي دبحني و راح
يملى جراح القلب أهات
لو هتكلم
هتلاقي الكلمة المجنونة
مسكونة بجني عليه حركات
عايز يخرج بره القمقم
ويسافر مهما يشوف مسافات
لكن هشتري بكلامي سكات
واعمل مكسوف
.....
مش أعمى صحيح
لكن ... مش عارف اشوف

ســــــــــــــر ........

القصه لسه بتبتدى
وحكايه انى عايش
بس ليكى
منتهيه
انا البطل
وانتى الروايه كلها
فى التمثيليه

ومين غيرك
هاقوله الشعر
واقوله الغنوه والموال
كلامى اتقال
ومش راجع
ومش ناوى اقول غيره
**********
اقولك سر
ومين خلقك
يا بنت الناس
يا حته ماس
انا فارد ف قلبى قلوع
ما ليها زى
عشان اقدر اخليكى
لعينى الضى
واشوف بيكى
واكون ليكى
واجيبلك م الورود الوان
وازرعلك ف يم القلب
ميت فدان
وتبقيلى
شجر طراح بكل الخير
وتبقيلى كشدو الطير
واكون موصوف علشانك
وورده ف قلب بستانك
وراضى حتى انى اكون
مجرد خيط
ف فستانك
انا نفسى يجينى اليوم
واكون سجنك وسجانك
ولا يشوفكيش
بشر غيرى
وعلشانك
انا فايت ف قلب الكون
ومش راجع
والا معايا م البشرى
ميتين بشرى
علشانك
*********
حبيبتى بجد
هاقولك سر من تانى
وكلمه اكيد مسيرها تكون
علشانك وعلشانى
انا مغرم باحوالك وترحالك
وفين ما تكونى يا حبيبتى
انا راح اكون
انا ف البعد متلملم مع الافكار
وقلبى ف البعاد صابر
ومستحمل
وبيجمل ف طعم الصبر
ولما هييجى يوم القرب
هيزغرد
ويبقالك كانه البلبل الشادى
يقول ف الشعر
حتى الشعر
مش طالع
وكل القول
دا ميكفيش
بانه يطلع الاحساس
يا اغلى الناس
كلامى مش كلام وخلاص
كلامى ان دل
فانه يدل ع الاخلاص
وحبه شوق
وحنيه وملاغيه
ولا يكفي
لكن لسه ناقصله الفعل
وفعلى عن قريب
هيبان
ولما يبان
هتبقيلى
وهابقالك
تناديلى
تلاقى بسرعه قلبى
ساب مكانه وطار
وغنالك
غناوى المحرومين م الشوق
وم الافراح
غناوى المشتاقين
للعشق يوم يزرع
ف القلوب
شجره هنا وافراح
دا شوقى للهوى طراح
وبستانك
اكيد هيساع
اكيد اصل الهوى انواع
ومهما هاقول
ومهما الشعر عنك قال
انا عشقك
وانتى بجد شاغله البال
ومين غيرك
هاقوله الشعر
واقوله الغنوه والموال

شيبتك اوان ...

ولساك بتنحت شكل بسمة
فى اللى فات
وترسم شفايف
بتضحك فى وشك
وتصنع حكاوى
تبيد السكات
تبالغ فى وصفك
وتكذب فى سرك
وتحسب ثوانى لغاية
ساعات
ووقتك ده ماضى
وجيًك رمادى
خلاص كله عادى
تعيشها آهات
هتفضل تدور على
حب صادق
وتكدب تزور
فى كل المناطق
وترجع تبرر
فهم المبادئ
وتقنع فى نفسك
ظروف أو طوارئ
وتمسح دموع الأمان
اللى كان
ويدمع ربيعك
ويندب كمان
هتعند؟ قصادك
خطاوى الزمان
شبابك فى شيبة
وشيبتك اوان

الحب ليه بالشوك طلع ..؟

الحب ليه بالشوك طلع

وياك يا عيد
بكره اكيد في رجعتك
هتشيل يا عيد مني الوجع
والاقي قلبي الي انجرح
يرجع يدوق طعم الفرح
وأشوف أماني حلمت بيها فـ دنيتي
ومعاها تاني بسمتي
احلى الكلام
وسحابة بتضلل علينا بالوئام
والقى الزهور تفرش ربيع
دنيا الامل
لكن يا دنيا الي افتكرته فـ يوم ملاك
أصبح هلاك....
وياه بشوف أمالي ليه صبحت سراب
وان يوم ندهت ما فيش جواب
وبقيت أمير في شرنقة
عايش حياتي في العذاب
والقلب من صدري انخلع
شايفه بعيد عن جنتي
حتى الوصال بينا اختفى
واحصد حنيني وشوق زرعته فـ دنيتي
غدر وألم
الحب ليه بالشوك طلع
وصبح عدم !!!

ابيض واسود ...

أبيض واسود

الليل كان برد
وبرغم الحقد اللى مدفينا !
بورق التوت
ومدارى يادوب ال مش مدّارى
عن الحرمان.!
والضحك فى ثانية علينا يفوت
من غيرما يصده جدار أحزان
هيستيريا الجوع تطلع ترقص
على دق طبول التنهيده
وتقول لمجون الشعر كمان.
أشتاتا يابو نواس ألشتوت
فى ايدين بشار الشوق نابوت
؛
الليل كان برد .
وقانون السهرة للسهر ؛؛ فتح البيبان
زى الغجر ؛؛ تحت القمر قاعدين نمصمص حلمنا
بدل اللبان !

والواد ابو شبشب زنوبه وخاتم فضة
بيمثل دور روميو المواويل
ويقلد رقص البنت اياها ؛
اللى انتحرت
_ بعد التقبيل_
من
قبل ما حتى يفيض النيل !

الليل كان برد
وتوب الفجر المتعلق فوق المسمار؛ رافض ينزل ويلف الكون
بنافس بعض ونتراهن على كنز قارون .
لوحة شطرنج ابيض واسود بتبان فى الضلمة بمليون لون.
وعليها بنلعب بنزاهه والفاشل
فينا... نوقفه جون !

الليل كان برد؛؛

ونصبنا العرض فى قهوتنا
ورقصنا التانجو بطريقتنا
وعملنا ملوك
وغسلنا صحون !
والنشوه تدب فى أوصالنا
والصرخة تهز جدار الكون
وسحلنا هولاكو وأتباعه
ف رموز بانينها
بطمى وطين
وطلقنا مدافع أفكارنا
تعلن قوانين ال لا قوانين
وقلعنا جلودنا
ورميناها فى عيون النار
ورسمنا سلالم ع الحيطة
وطلعنا ندندن ب المزمار
وعملنا شيوخ وعملنا يهود
وساعات كفار
وبنينا ضريح للشيخ عطعوط ( وف اخر السهره اكيد اتهد )
وبدأنا الحفلة بدق الزار

وبقينا نبوح؛ بتراب الروح
ونفضى جيوبنا من الاسرار
وبزهو نطوف لاعنين الخوف
وكأن الحرية كواكب
واحنا الأقمار ....

الليل كان برد ؛؛
ومسام الارض بتشربنا
وتفجر فينا وتطردنا
زى البراكين
ورموش الجنّية تنادى
فابنجرى على ايدينا
ونسجد تحت النهدين؛
زى الديدان.
وسط الغيطان.
سارحين نجمَّع فى حظوظنا
م السد العالى لراس التين

الليل كان برد
؛؛
وكل السلع من غير فلوس
رافضين طقوس الدروشه
والدروشه هى الطقوس!
ما احنا اللى جينا بدون خشا
مين فينا طالع من فانوس

الليل
كان
برد
.