المهم تــكون حقــيــقــة ....

بين سطور عمري انكتبت
حب مالهوش يوم ميلاد
وهم عايش في الخيال

وأما أقابلك يوم وأحس
انك أنت حلم حي
فجاءة ألاقي الحلم وهم

والسؤال لساه سؤال
عمره ما كان ليه إجابة

ليه ساعات ألاقيك حقيقة
أيد تراعيني وجريئة

وليه ساعات ألاقيك جروح
رمح يقتل أي روح


ليه الكلام وياك سكوت
والمشاعر ليل يفوت

لما اقربلك تخون
وابتعد ألاقيك ندهت
وأما بسأل أنت فين
وأندهك ألاقيك مشيت

هي ليه معكوسة صورتك
عايمة فوق سطح الدموع
وأما أفكر أحضنك
انطفي زى الشموع

ليه أعيشك جوه نفسك
واحكي لخيالك حكايتي
وأما أفكر المسك
تنغرس في الوهم أيدي


قولي أمتي تكون حقيقة
امتى أشوفك لو دقيقة
وأرسمك في الشمس ضلي

قولي أمتي تكون معايا
أمتي تبقي نجوم سمايا
وأكتبك عنوان حياتي

لو تمن حبك سكاتي
قولي هسكت
مش هحاسبك
م النهاردة ليوم وفاتي
بس تبقي حقيقة مرة
وكفاياك كدب ومذلة
سبني أشوف الدنيا جنة
وادي نفسك فرصة تانية

وكفاياك يا حلم عمري
تبقي وهم وكدب عشته
وكفاياك يا جرح عمري
تبقي جرح وظلم عشته

لو غرامك كان مزيف
قولي هعشق فيا زيفك

لو حنانك أصله قسوة
قولي هعشق فيك قساوتك

ولو هتبعد مش هحاسبك
مش هخاف أبدا فراقك
مهما تبعد راح تعود
المهم تكون حقيقة
مش خيال وحكاية كدب

......