كل ما بسمع صوتك ببكي
ايوه بحِس ان انت واحشني
واحش روحي
واحش عيني
واحش قلبي
كل ما بسمع صوتك ببكي
بعرف بس ساعتها الفرق ما بين العالم كله وبينك
وبــ توحشني اللحظه الحلوه
لما تاخدني ما بين دراعينك
وبـ توحشني النظره الحلوه
اللي بشوفها بــ تسكن عينك
يصرخ قلبي ويحزن جدا
ينده صوتي ويهمس فينك ..!!!
لما بقابل ناس مش انت
بعرف بس ساعتها الفرق ما بين العالم كله وبينك
وافضل ساكت واصبر لحظة
نظرة عيني بـ تلضم ساعه فـ ساعه فـ ساعه
لجل ما تِخطف بيهم بكرة !
ياااااه على قلبي اللي بــ يتوجع
يااه على قلبي اللي بـ يتوجع لما بحس ان اللي باعدنا يادوب مسافات
نفسي اخطي الدنيا واجيلك
نفسي اشكيلك
نفسي ابكيلك
نفسي اغمض عيني وافتح والقىَ دا كله يادوب خيالات
ياااااااه على قلبي اللي بــ يتوجع
لما بحس ان اللي باعدنا يادوب مسافات !!!
صعبه حياتي كتير فــ بعادنا
صعبه حياتي كتير من غيرك
واتأكدت وبس الليله
اني ماليش فـ العالم غيرك
فــ اللحظادي بجد انا تايه
اه بكتبلك وانا مش عارف افرق بين الدمعه وحــِبري !
فااااااايض صبري
فاض الصبر ونفسي اشوفك
تمسح دمعي بـ حضن كفوفك
دانا من يوم ماقابلتك حاسس
اني الولد الطفل النونو
اللي فــ حضنك بس بــ يقدر يجري و يهرب من احزانه
واللى عشانه بــ توهب روحك
وبــ تِرميها ما بين احضانه
وازاي اقدر ابعد عنك
دانتَ حبيبي وصحبي
ونفسي وروحي وكل الناس
انا فــ بعادك حاسس العالم صخره بــ توجع
شئ مافيهوش ذرة احساس !
اه فــ غيابك شعوري بجد واجعني
ايوه بــ تصعب نفسي عليا
حاسس بـ روحي ضعيفه وخايفه
حاسس حياتي دي صحرا وجافه
وانا برويها بــ دمعة عيني
مانتَ النهر الحلو وبس اللي بــ يسقيني
وانت الحضن اللي بــ يحميني
وانت الصوت اللي اما سمعته
دوِب دمعي فــ نهر حنيني
واما لقيتك مش ادامي ونفسي ابوحلك
داب احساسي فـ حضن الورقه ورحت اكتبلك
رحت اقولك عن احساسي اللي بــ يتعذب لما وحشته
ايوه صحيح احساسي يادوبك بس كتبته وماتكلِمتش
بس ارتحت عشان كلِمتك لو عــ السطر
!!
ايوه ارتحت عشان فضفضت
!!!!!!
