لما بتوحشيني ...

عارفة لمّا بتوحشينى
وأنتِ عنّى خلاص بعيدة
لمّا فى الأحلام تجينى
وأنسى أحلامى السعيدة
وأصحى ويّا دموع ف عينى
ذكريات مرّة وعنيدة
لسّه ليكى بتنادينى
رافضة أحلامى الجديدة
راضية بالماضى وأنينى
لمّا كنتى بتوهمينى
إنّى ضلِّك،وإنى شمسك
وإن قلبى ف قربه ليكى
قوّى إحساسك بنفسك
يبقى كنتى بتخدعينى
لمّا شُفت دموع عنيكى
لمّا خٌفت الخوف يمسِّك
لمّا بالعمر أشتريكى
وإنتِ لسّه ف عز رُخصك
كنتى ليه بتعذبينى؟
وتصونينى بصمت بارد
وتخونينى بعلوْ حِسِّك
يبقى مين فينا اللى قاصد؟
اللى باع ،ولا اللى حَسِّك؟
لمّا كل حروف لغاتى
بالرضا تكتب ف إسمك
كل لون حلو ف حياتى
سيبته خط جميل فى رَسمِك
يبقى أنا أستاهل أهاتى؟
ياللى لسّه بتوحشينى
لازم أمنع ذكرياتى
وأمحى صورتك من سنينى
بعد ليلى ...الضى آتِ
يبقى بكرة جميل فى عينى
.........

ألا أونا ألا دو ألا ترى ....

جينا فى نفس الميعاد

بقلب عاوز مشترى

يلا هنقفل المزاد

ألا أونا ألا دو ألا ترى

مزادنا جد الجد

ومش جايين نهرج

معانا قلب بجد

واللى ما يشترى يتفرج

فرصه ما تتعوض

قلب جرحه الزمن

يلا مين يزود

مين معاه التمن

.....
.......

يا دنيا يا مقلوبه

قلوبنا رخص تمنها

فينا قلوب مغلوبه

وقلوب راح زمنها

قلوب مليانه طيبه

بكل الناس بتحس

عاشت وماتت غريبه

ولا حدش بيها حس

وأنا قلبى واحد منهم

إتألم وعاش وحيد

دايماً أنا مآمنهم

وألاقى جراحى تزيد

دايماً أحب وأفارق

وألاقينى دايماً غارق

فى بحور آلام وجراح

قوليلى يا أفراح ...

إمتى بقه هتجينى

آآآه يا عمرى وسنينى

إتمليتى ليه بالويل ؟

آآه يا أطول ليل

إمتى هأشوف النور

يا قلبى يا مكسور

ليه زمانك قاسى

ودايما كده بتقاسى

اللى تحبه يخونك

بيقولك أنا مجنونك

ودايب كده فى هواك

وأهووو بالنار كواك

جرح فيك وباعك

وسابك لأوجاعك

يا قلبى ألف آه

على اللى مات جواه

شوقه وحنينه

واللى ضاعت سنينه

وهوه شارب مُر

واللى منه يمُر

عمره ولا عاش

دا الجرح ما خلاش

للفرح أى مكان

أنا قلبى كان ...

مآمن للحبايب

وعن بالى كان غايب

إن الزمن دوار

طويل قوى المشوار

آآآه مشوار طويل

وفيه ألف ليل

قضيتهم أنا فى الحيره

قضيت أيام كتيره

وأنا ماشى فوق الشوك

يا قلبى ياللى خانوك ..

إياك تآمن تانى

يا قلبى عيش وحدانى

وصُد الهوى لو جالك

خليك ياقلبى فى حالك

وإياك فى مره تحِن

آآه قربت خلاص أتجن

زرعت شجرة حب

ورويتها بالإخلاص

طرحت جراح فى القلب

وعذاب ما منه خلاص

طرحت ألم ومرار

طرحتلى غدر ونار

وخيانه للأشواق

وجرح عدى وفاق

كل الكلام والوصف

خليكوا واقفين صف

وإضربوا أجدع سلام

أُقفى هنا يا آلام

وإنتى يا خيانه هنا

والغدر كمان مننا

والحيره والحسره

وكمان الجراح والكسره

خليكم قريبين

وبلغوا الغايبين

قولولهم عن ميعادنا

اللى فيه مزادنا

فرصه أوعوا تضيع

قلبى إتعرض للبيع ..