أبقى جنبك
يبقى كتفى جنب كتفك
يبقى أحسن ؟
و لا لازم ابقى ضلك
آجى خلفك
بعد منك ؟
ده السؤال اللى سألته
و الإجابه الاقيها عندك
اللى طالبه من ساعتها
هى فرصة
أصل قصة حبى ناقصة
عايزه تكمل
و انت أجمل
م النهاية بشكل محزن
يبقى أحسن
لو ألاقى إجابة تشرح
لجل ما افرح بيك و تفرح
كل أيامنا سوا
و السؤال على قد حجمه
الإجابة عليه دوا
كل حاجة هتبقى أوضح
العلاقة هتبقى أوضح
و الطريق فى السكة أوضح
و الكلام فى الحب بيننا
يبقى شجرة قطوفها دانية
لما ناخد منها تطرح
بس تفهم قبله قصدى
الحكاية مش خناقة و مش عياقة
و المناقشة بشكل ودى
المشاعر فى البداية بتبقى حلوة
وردتين و رنة ناعمة و ألف غنوة
بس بعدين شكل تانى
و الحياه مش بس وردى
المشاكل لما تظهر
لازم اعرف ايه عليه
هل على انى أشارك
و لا ابارك
و لا ألزم صمتى خالص
و لا أأمن لما تفتى
ايه اللى مطلوب منى دايما
انى اسقف لما تخطب
و لا لما تنوى تخطب
و لا بعدين لما تنهى
لأ حقيقى نفسى أعرف
وضعى جنبك شىء بيخجل
مش مشرف ؟
و الا متعود تحيط نفسك بهالة
و استحالة
تنتقص منها عشانى
و السؤال و بشكل تانى
لما تغرب شمس ضيك
و انت مختار ابقى ضلك
تبقى مرتاح لاختفائى ؟
و اكتفاءى
بالإيماءة
هو لحظة إختيارى
هو ميه تطفى نارى
لما أنفذ لك أوامرك
